Peşə hazırlığına cəlb olunma

Peşə hazırlığına cəlb olunma

Peşə hazırlığı nədir:

 

Peşə hazırlığı - işaxtaran və işsiz şəxslərin əmək bazarının tələbatına uyğun olaraq təhsil müəssisələrində ixtisasa, peşəyə və ya yeni ixtisasa yiyələnmək üçün peşə təhsili almasıdır.

 

Peşə hazırlığının əsas məqsədi heç bir peşəyə sahib olmayan, əvvəlki peşəsi üzrə əmək bacarıqlarını itirən və ya yeni peşəyə sahib olmaq istəyən işaxtaran və işsiz şəxslərə əmək bazarının tələbatına uyğun müvafiq peşə bacarıqlarının aşılanmasıdır.

 

Peşə hazırlığı Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin ərazi məşğulluq mərkəzləri filiallarının göndərişi əsasında aşağıdakı hallarda həyata keçirilir:

 

1. işaxtaran və işsiz şəxslər lazımi peşə və ya ixtisası olmadığına görə onun üçün münasib iş seçmək mümkün olmadıqda;

2. işaxtaran və işsiz şəxs əvvəlki peşə (ixtisas) üzrə işləmək qabiliyyətini itirdikdə.

 

Peşə hazırlığının təşkili:

 

Peşə hazırlığı Dövlət Məşğulluq Agentliyinin ərazi məşğulluq mərkəzləri filialları tərəfindən işaxtaran və işsiz şəxslərin əmək bazarına uyğun ixtisasa malik olması məqsədi ilə peşə hazırlığını həyata keçirən müəssisələrdə həyata keçirilir.

Bununla yanaşı, peşə hazırlığı kursları işsiz şəxslər üçün ödənişsiz əsaslarla, işaxtaran şəxslər üçün isə ödənişli əsaslarla təşkil olunur. Peşə hazırlığına cəlb olunan işsiz şəxslər peşə hazırlığı müddətində təqaüdlə təmin olunurlar.

 

Müddət və sertifikat:

 

Peşə hazırlığı üzrə təşkil edilən kurslarda təhsil müddəti 6 (altı) aya qədərdir.

Tədrisin müddəti peşə hazırlığı kursundan asılı olaraq dəyişir. Peşə hazırlığını başa çatdırmış və ixtisas imtahanını müvəffəqiyyətlə vermiş müdavimlərə Əmək və Əhalinin Sosial Müdafiəsi Nazirliyi tərəfindən forması təsdiq edilmiş sənəd verilir.